Halldóra Þórarinsdóttir

21.4.2010 | 12:51

Alveg er hún einstök ljósmyndin hans Ólafs

Þætti afar sanngjarnt að þetta yrði valin ljósmynd ársins 2010 bæði hérlendis sem og erlendis! Sérlega í ljósi þess að hún er tekin á flótta undan náttúruöflunum, þegar blásið hafði verið til neyðartæmingar á nærstöddum bæjum, sem sagt fest í minni á einu litlu andartaki án nokkurs undirbúnings. Einfaldlega smellt af með fingrunum. Og þvílík útkoma. Enga mynd hef ég fegurri litið, þrátt fyrir ógnina sem hún lýsir.

Sé þessa ljósmynd fyrir mér prýða ýmislegt nytsamlegt í framtíðinni, svo sem 200-1000 stykkja púsluspil, dagatöl, tölvumottur, kaffi- og tebolla, kápur á vönduðum dagbókum sem og stuttermaboli af ýmsu tagi. Einnig er hægt að selja stórar eftirprentanir af myndinni, nokkurs konar plakat, sem hægt er að hafa til augnayndis á vegg heima fyrir. Ekki væri vitlaust að Ólafur Eggertsson og fjölskylda ræddu við þá sem eru í slíkum viðskiptum/hönnun og jafnvel fengju sér umboðsmann? Að minsta kosti á þessi mynd svo sannarlega erindi inná hvert heimili og þá sérlega í stórborgum erlendis þar sem fólk býr á steypunni langt fjarri slíkri ægifegurð náttúrunnar.